2} ರೈಲ್ವೇ ನಿಲ್ದಾಣದಲ್ಲಿ

2. ರೈಲ್ವೇ ನಿಲ್ದಾಣದಲ್ಲಿ -ಕೆ.ಎಸ್.ನರಸಿಂಹಸ್ವಾಮಿ ' ಎಲ್ಲ್ಲಿದ್ದೀಯೇ ಮೀನಾ ?' ಇಲ್ಲೇ ಇದ್ದೇನಮ್ಮ. 'ತೊಟ್ಟಿಲು , ಪೆಟ್ಟಿಗೆ , ಹಾಸಿಗೆ ?' ಇಲ್ಲೇ ಇವೆಯಮ್ಮ. ಏನನ್ನೋ ಮರೆತಂತಿದೆ ?' ಮರೆಯುವುದೇ , ಹೇಗೆ ? ' ಏನನ್ನೋ ನೆನವಂತಿದೆ ?' ನಾನಿರುವುದೆ ಹಾಗೆ. ' ಬಿಸಿನೀರಿದೆಯೇ ಮೀನಾ , ಮಗುವಿನ ಹಾಲಿನ ಪುಡಿಗೆ ?' ಬೇಕಾದಷ್ಟಿದೆಯಮ್ಮ - (ಕಣ್ಣಲ್ಲೂ ಜತೆಗೆ ). ' ಮಗುವನು ಹಿಡಿಯೇ ಹೀಗೆ, ಕಪ್ಪಿಡುವೆನು ಹಣೆಗೆ - ಮೈ ಬಿಸಿಯಾಗಿದೆಯಲ್ಲೆ ಹೊರಡುವ ಸಮಯಕ್ಕೆ !' ಘಂಟೆಯ ಹೊಡೆತಕೆ,ಸಿಳ್ಳಿಗೆ , ಬೀಸಿದ ಬಾವುಟಕೆ ನಡುಗುತ್ತಿದೆ ಬಂಡಿಯ ಮೈ ದೀಪದ ಬೆದರಿಕೆಗೆ. ಕಿಟಕಿಯ ಜತೆಗೂ ಬರುವುದು ಬೇಡಮ್ಮ , ಹೋಗು. ಇಲ್ಲಿಂದಲೇ ಕೈಮುಗಿಯುವೆ - ನಲ್ಲಿಂದಲೆ ಹರಸು. ಕಂಬಿಗಳುದ್ದಕ್ಕು ಹಬ್ಬಿತು ಎಂಜಿನ್ನಿನ ಕೂಗು : 'ಎಲ್ಲಿದ್ದೀಯೆ ಮೀನಾ , ಎಲ್ಲಿದ್ದೀಯೆ ?' ಕಿಡಿಗಳು ಹೊರಳುವ ಹೊಗೆಯಲಿ ಹೆಗ್ಗಾಲಿಗಳುರುಳು ; ಇಲ್ಲೇ ಇದ್ದೇನಮ್ಮ , ಇಲ್ಲೇ ಇದ್ದೇನೆ. 'ಕಿಟಕಿಯ ಮುಚ್ಚಿಕೊ ಮೀನಾ, ಕಿಡಿ ಬೀಳುವುದೊಳಗೆ', - ಕಿಟಕಿಯ ಮಚ್ಚಿದೆನಮ್ಮ , ಕಿಡಿ ಬೀಳದ ಹಾಗೆ.